Financis
Come paron de scuadre tu sês ancje responsabil de financis de scuadre. Tu pais lis spesis e tu cjapis lis jentradis al inzornament setemanâl. Tu puedis viodi cuant che al è pe to leghe te pagjine
Inzornaments locâi.
Par esempli, se tu compris un zuiadôr de liste dai trasferiments par 10 000 US$ il zuiadôr al è disponibil daurman, i “gnûfs contrats” a son aumentâts di 10 000 US$.
Jentradis e jessudis
Te pagjine de financis tu puedis viodi il belanç de setemane in cors e il rindicont di che prime. Ve ca il significât des vôs:
Jentradis
Jentradis de partide: Lis jentradis des partidis cjasalinis e des partidis di mieze setemane. Par detais su lis jentradis dal public, cjale il cjapitul10 'Stadi'.
Sponsor: Ogni setemane tu cjapis une some dai sponsor. Dâ un cuc al cjapitul 'Tifôs e sponsor' par altris detais.
Venditis di zuiadôrs: Se tu âs vendût cualchi zuiadôr, il vuadagn al ven fûr chi. Da un cuc al cjapitul 'Trasferiments' par ve plui informazions.
Comissions: Se tu âs ricevût bêçs par sedi il prin o l'ultin proprietari di un zuiadôr, i vuadagns a vegnaran mostrâts chi. Cjale il cjapitul 'Trasferiments' par vê plui informazions.
Provisoris: Lis jentradis fûr vie a vegnin ingrumadis a chi, come la iscrizion di gnûfs tifôs e premis in bêçs.
Jessudis
Stipendis: Ogni setemane tu pais i stipendis dai zuiadôrs. Par ogni zuiadôr tu pais 250 € plui une cierte cifre a seconde de abilitât e de etât. Tu pais 20% in plui pai zuiadôrs che vegnin dal forest.
Manutenzion dal Stadi: Il mantigniment setemanâl dal to stadi, viôt il prossim cjapitul.
Costruzion dal stadi: Coscj di costruzion o di demolizion se tu modifichis il stadi.
Dipendents: Ogni membri dal staff al coste jenfri 1 020 US$ e 33 840 US$ par setemane, in base al nivel dal dipendent (di 1 a 5) e de lungjece dal contrat (di 1 a 16 setemanis).
Rêt di osservadôrs: Il cost setemanâl de tô scuadre zovanîl, o il tô investiment setemanâl te rêt di osservadôrs.
Gnûfs contrats: I coscj in câs di acuist di gnûfs zuiadôrs. Cjale il cjapitul 'Trasferiments' par vê plui informazions.
Provisoris: Lis jessudis fûr vie a vegnin ingrumadis a chi, come il licenziâ membris dal staff e promovi zuiadôrs in prime scuadre.
Interès: Se tu âs debits tu âs di paiâ i interès.
Bêçs pronts di spindi e risierve de societât
La societât e met un limit ai bêçs che un gjestôr al pues doprâ par spesis come stipendi, trasferiments o lavôrs tal stadi. Il rest dai bêçs ju metin te risierve de societât par tignî salde la scuadre. Se al covente, la societât a spostarà cualchi franc de risierve al capitâl curint, ma nome un pôc ae volte.
Il Diretôr Finanziari, che al pues sedi cjapât su tal staff, al pues aumentâ sedi il capitâl sedi lis ratis dai bêçs che a tornin de risierve de societât
Debits e faliment
Nol è nuie che ti tignîdi dal spindi bêçs ancje se il to belanç al è a zero. Tu puedis vê un piçul debit e continuâ a spindi par comprâ zuiadôrs o assumi un alenadôr. Cuant che tu rivis a 200 000 US$ di debit lis opzions par spindi a saran limitadis. Tu âs ancjemò une vierzidure di credit di 500 000 US$ in bancje, ma tu varâs di paiâ interès pesants pe cifre prestade.
Se tu superis il debit di 500 000 US$ tu cjaparâs un avîs di bancjerote. Se cul belanç no tu tornis disore il debit di 500 000 US$ in dôs setemanis dal avîs di bancjerote, tu scugnarâs lassâ il sisteme des Seriis di Hattrick! Ocjo che se une scuadre e à avonde zuiadôrs di vendi par tornâ te "zone di sigurece", o se la scuadre e à avonde bêçs te risierve, la scuadre no larà in bancjerote (ma continuarà a pajâ i interes dal so cont corent).