O encontro: Conceptos básicos

Conceptos básicos da simulación dos encontros

En cada parte dun encontro fanse un número de ataques, e o medio do campo decide que equipo obtén cada ataque. O equipo cun medio máis forte (o equipo con maior posesión de balón) é moi probábel que teña o maior número de ataques.  Cando un equipo ataca, decídese que tipo de ataque vai ser. Os ataques básicos consisten en ataques pola banda dereita, pola esquerda ou polo centro, e tamén xogadas a balón parado (libres directos e penaltis). O ataque do equipo atacante para esa demarcación tentará rachar coa defensa do equipo que defende nesa mesma demarcación.

Os ataques normais

En cada encontro son xerados un número de ataques básicos (como expliquei antes). Algúns deses ataques son abertos e poden ser xerados por ámbolos dous equipos, e outros son exclusivos dun só equipo.

Nos ataques abertos o medio do campo decide que equipo xera o ataque. Os ataques exclusivos funcionan do mesmo xeito, pero cunha excepción: se o teu medio "gaña" un dos ataques exclusivos do teu rival conseguirás parar o ataque, pero non se converterá nunha ocasión para ti. Ti non podes conseguir as ocasións exclusivas dos teus rivais e eles non poden conseguir as túas.

A maioría dos ataques básicos son comentados no informe do partido, pero os ataques que quedan moi lonxe de acabar en gol nin sequera son informados.  Tamén podedes conseguir ataques adicionais grazas aos "Eventos Especiais" e aos contraataques. Estes ataques adicionais descríbense nos outros dous capítulos do encontro.

Vantaxe do equipo local

O equipo local vese axudado polos seus seareiros. Normalmente tes unha porcentaxe máis elevada de posesión na casa que fóra.  Nun derbi (cando ámbolos dous equipos son da mesma rexión) o equipo local tamén recibe esta vantaxe, mentres que o equipo visitante só a metade. Se o xogo dispútase nun campo neutral, ninguén recibirá esa vantaxe, aínda que un equipo pertenza á rexión onde se dispute o encontro.

Psicoloxía e mentalidade do adestrador

O espírito, a confianza e a actitude do equipo afectan ao rendemento do mesmo. Podes ler máis sobre como Hattrick simula isto no capítulo de "Psicoloxía".
A mentalidade do adestrador (ofensivo, defensivo ou neutral) tamén ten a súa importancia. Máis información no capítulo "Adestrador".

Ao que deberías prestarlle atención é ás cualificacións do equipo

Despois da disputa dun encontro, obteredes unhas cualificacións do equipo para cada parte do equipo. Estas cualificacións informaranvos do nivel de rendemento das diferentes demarcacións do teu equipo e esas cualificacións son tamén o que determinan na actualidade o cálculo do encontro.

As denominacións das cualificacións dos partidos divídense en catro subniveis: moi baixo, baixo, alto e moi alto. Sabendo que a escala vai dende nulo até caralludo, é sinxelo coñecer como son as túas cualificacións, dentro duns rangos. Por exemplo, unha cualificación de "bo (moi alto)" é lixeiramente peor que un "excelente (moi baixo)", pero bastante mellor que un "pasable (moi baixo)"

Cualificación en Estrelas

Despois dun partido os teus xogadores reciben unha cualificación en estrelas polo seu rendemento durante o mesmo. A máis estrelas, mellor actuación.

Ten en conta que as estrelas só valoran o rendemento individual do xogador na súa posición e son de utilidade para comparalas con outros xogadores que xogaran na mesma posición. De todos xeitos non é o mellor camiño para evaluar o rendemento do equipo, para comparar a nivel global ese rendemento (e a súa vez comparalo con outros equipos) debes mirar as cualificacións do equipo.

Debes ter en conta tamén que os efectos do equipo (coma a perda de contribución para máis dun xogador na posición central, ollar o capítulo básico de aliñacións) non se ven reflectidos nas cualificacións.

Un caso normal

En resumo, o estado do medio do campo decide o número de oportunidades que o teu equipo producirá durante un encontro. As outras partes do equipo decidirán a probabilidade de que eses ataques se convertan en goles.

A seguinte táboa axudarache algo cando fagas a aliñación. Ten en conta que só se trata dunha aproximación.  Algúns niveis de habilidades seguindo a outros poden significar só lixeiras diferenzas no rendemento, mentres que para outros as diferenzas poderían ser moito maiores. Ademais, as ordes individuais ou a perda de contribución para dous ou máis xogadores na posición central (ver o capítulo previo) non foron tomadas en consideración.

Parte do equipo	Factores (o máis importante primeiro)
Medio do campo	Xogadas dos mediocampistas Xogadas dos extremos Xogadas dos defensas centrais Xogadas dos dianteiros Xogadas dos defensas laterais
Ataque banda esquerda	Extremo do extremo esquerdo Extremo do defensa lateral esquerdo Anotación dos dianteiros Pases do mediocampista esquerdo Pases do extremo esquerdo Extremo dos dianteiros Pases dos dianteiros Pases dos mediocampistas
Defensa banda esquerda	Defensa do defensa lateral esquerdo Portería do porteiro Defensa do defensa central esquerdo Defensa do extremo esquerdo Defensa polo medio dos defensas centrais Defensa do porteiro Defensa do mediocampista esquerdo Defensa polo medio dos mediocampistas
Ataque central	Anotación dos dianteiros Pases dos dianteiros Pases dos mediocampistas Anotación dos mediocampistas Pases dos extremos
Defensa central	Defensa dos defensas centrais Portería do porteiro Defensa dos mediocampistas Defensa dos defensas laterais Defensa do porteiro Defensa dos extremos
Ataque banda dereita	Extremo do extremo dereito Extremo do defensa lateral dereito Anotación dos dianteiros Pases do mediocampista dereito Pases do extremo dereito Extremo dos dianteiros Pases dos dianteiros Pases dos mediocampistas
Defensa banda dereita	Defensa do defensa lateral dereito Portería do porteiro Defensa do defensor central dereito Defensa do extremo dereito Defensa polo medio dos defensas centrais Defensa do porteiro Defensa do mediocampista dereito Defensa polo medio dos mediocampistas